Rooney verður að róa sig niður

Fabio Capello landsliðsþjálfari Englendinga segir að Wayne Rooney verði að læra betur að stjórna skapi sínu.

Rooney fékk að líta rauða spjaldið er Manchester United tapaði fyrir Fulham um helgina. Hann fékk sína síðari áminningu í leiknum fyrir að kasta boltanum í átt að Phil Dowd dómara. Þegar hann gekk svo af velli kýldi hann hornfána.

„Hvað varstu að kýla hornfánann? Þú er brjálaður maður, brjálaður maður," er haft eftir Capello í enskum fjölmiðlum í dag. Þetta mun hann hafa sagt á fundi landsliðsins en England mætir Slóvakíu í vináttulandsleik um helgina.

Rooney fékk rautt í fjórðungsúrslitum HM 2006 í Þýskalandi eins og frægt er orðið en hefur ekki fengið gult í síðustu fimm landsleikjum sínum. Hann hefur aðeins fengið sex áminningar á öllu tímabilinu fyrir leikinn um helgina.

Capello er sagður hafa áhyggjur af sumum landslðismanna sinna, til að mynda Ashley Cole sem var handtekinn fyrir ólæti á almannafæri og vanvirðingu við lögregluþjón. Þá var Steven Gerrard kærður fyrir líkamsárás eins og frægt er en sú kæra var látin niður falla.