Veit ekki til þess að millifærslur séu til rannsóknar hjá FME

Gunnar Andersen, forstjóri Fjármálaeftirlitsins, segist ekki vita til þess að millifærslur þær sem greint var frá í kvöldfréttum Stöðvar tvö annarsvegar og RÚV hinsvegar séu til rannsóknar hjá eftirlitinu.

Í fréttum RÚV kom fram að aðilar tengdir Glitni, þar á meðal fyrrum bankastjórar, hefðu fært hundruð milljóna af reikningum sínum hjá bankanum rétt fyrir hrun.

Gunnar segist ekki vita nákvæmlega hvort málið sé til rannsóknar af hinum mýmörgu málum á borði eftirlitsins.

„Það þarf ekki að vera að það sé óeðlilegt þó einhver hafi flutt peninga úr landi," segir Gunnar í samtali við fréttastofu.

Í fréttum Stöðvar tvö kom fram að ýmsir auðmenn hefðu forðað milljörðum af reikningum sínum hjá Straumi í skattaskjól erlendis. Þrír þeirra hafa þó borið það af sér með öllu.

Gunnar sagðist heldur ekki geta staðfest að þau mál væru til rannsóknar, en benti þó á að slík brot gætu hugsanlega heyrt undir skattayfirvöld.