Flugakademía Keilis farin í útrás til Kína

Skólamál Flugakademía Keilis hyggur á útrás með því að flytja inn flugnemendur frá Kína. Von er á fyrsta nemendahópnum í janúar næstkomandi.

Hjálmar Árnason, framkvæmdastjóri Keilis, segir skólann vel samkeppnishæfan við flugskóla í nágrannalöndunum. Skólinn sé ódýrari, hafi á að skipa mjög hæfum flugkennurum og sé vel tækjum búinn.

Að sögn Hjálmars er að því stefnt að hingað til lands komi um 200 Kínverjar árlega til flugnáms hjá Keili. Ekki liggur hins vegar fyrir enn hversu margir nemendur verði í fyrsta hópnum sem hingað kemur. Þeir kunni að vera á milli 20 og 70 talsins.

„En við erum með starfsmann í Kína sem vinnur þetta með okkur,“ segir Hjálmar, en þar í landi er verulegur skortur á menntuðum flugmönnum.

Enn er verið að byggja við og efla flugnámið en nýverið bættust við þrjár kennsluflugvélar í fimm flugvéla flota Keilis. Allar eru vélarnar fjögurra manna, tvær DA-40 TDI eins hreyfils vélar og ein DA-42 NG (New Generation) tveggja hreyfla vél.

Vélarnar eru tæknilega fullkomnar, með koltrefjabúk, sem er sterkari en hefðbundinn álbúkur. Það þýðir að farþegar vélarinnar eru betur varðir komi til óhappa. Þá er vél- og tækjabúnaður af allra nýjustu sort.

Kári Kárason, skólastjóri flugakademíunnar, segir að meðal nýjunga sé til dæmis sjálfstýribúnaður sem nýnæmi sé að hægt sé að kenna á í svo litlum vélum. Búnaðurinn sé svipaður þeim sem notaður er í stórum farþegaþotum. Þá segir Kári öryggisatriði að vélarnar séu búnar stórum skjám, sem sýni meiri sjóndeildarhring en aðrar vélar.

„En það þýðir að menn eiga betra með að halda áttum í erfiðum aðstæðum,“ segir hann.

Þá eru vélarnar búnar dísilhreyflum sem eru minni að rúmmáli en aðrir, en skila þó sama afli. Vélarnar séu æði sparneytnari og noti í ofan­álag þotueldsneyti, sem sé ódýrara en flugvélabensín.

Hvað aukin umsvif í flugnáminu varðar segir Hjálmar svo stefnt að því að auka námsframboð tengt fluginu. Nýlega sé hafið flugfreyjunám, en í janúar eigi svo að hefja kennslu í flugvirkjun. Þá sé í pípunum að koma á flugrekstrarnámi.