Ákvörðun peningastefnunefndar mikil vonbrigði

Jóhanna Sigurðardóttir, forsætisráðherra, segir ákvörðun peningastefnunefndar Seðlabankans að halda stýrivöxtum óbreyttum í 12%, og greint var frá í dag, vera mikil vonbrigði. Þetta kom fram í umræðum á Alþingi í morgun.

Jóhanna telur að peningastefnunefnd hafi metið það svo að krónan þurfi að styrkjast meira áður en bankinn geti lækkað stýrivexti.

Forsætisráðherra segir að það séu mikil vonbrigði að stöðugleikasáttmálinn sem undirritaður var í síðustu viku hafi ekki haft þau áhrif að stýrivextir væru lækkaðir. Að mati Jóhönnu eru allar forsendur fyrir því að stýrivextir verði lækkaðir niður í eins stafs tölu í haust.