Rökvilla Þorsteins Pálssonar

Þorsteinn Pálsson skrifaði grein í Fréttablaðið á laugardaginn þar sem hann komst sem fyrr að því að rétt sé að beita heilbrigðri skynsemi við stjórn fiskveiða.

Í lok greinarinnar dró hann upp tvo kosti sem hann telur að margt bendi til að þjóðin standi frammi fyrir og spyr á hvora sveifina íslenskir útvegsmenn leggjast ef sú er raunin.

Þessir kostir eru að mati Þorsteins Pálssonar „Að innleiða gamla úrelta fiskveiðistjórnun Evrópusambandsins og hafna aðild eða ganga í sambandið og verja rétt Íslands til veiða og hagkvæmrar stjórnunar á grundvelli takmarkaðra markaðsreglna eins og verið hefur.”

Með þessari uppstillingu sneiðir Þorsteinn Pálsson fram hjá hinu augljósa, sem er að innganga í ESB kemur ekki í veg fyrir að íslensk stjórnvöld sniðgangi skynsemina og setji íslenskum sjávarútvegi vitlausar reglur. Það sem breytist hinvegar er það að til viðbótar því að íslensk stjórnvöld geti sett sjávarútveginum óskynsamlegar reglur þurfum að lúta þeim reglum sem ESB kýs að setja okkur.

Verkefni íslenskra útvegsmanna er því eftir sem áður að stuðla að því að á Íslandi verði rekinn sjálfbær og arðbær sjávarútvegur sem skilar íslenskri þjóð mestum arði af mikilvægustu auðlind okkar. Innganga Íslands í ESB er ekki lóð á þá vogarskál.

Höfundur er framkvæmdastjóri LÍÚ.