Gleðilega þjóðhátíð

Í dag hefst þjóðhátíð Vestmannaeyja. Með sanni má segja að setning hennar marki upphafið á þriggja sólarhringa gleði þar sem Eyjamenn og gestir kristalla eðli Vestmannaeyja og þá orku sem í samfélaginu býr.

Hátíðin hefur allt frá 1874 gefið Eyjamönnum einstakt tækifæri til að sýna þann kjarna sem er í samfélaginu. Eyjamenn eru kröftugir og miklir gleðimenn og þjóðhátíð er þeirra hátíð þar sem öllum er boðið að vera með. Í aðdraganda þjóðhátíðar leggjast Eyjamenn allir á eitt og er undirbúningur borinn uppi af sjálfboðaliðum sem gefa vinnu sína með glöðu geði svo hátíðin geti orðið að veruleika. Í raun er samfélagið allt ábyrgt fyrir þjóðhátíðinni og stemningin mögnuð upp allt árið. Í skólum og á vinnustöðum er gjarnan hengt upp dagatal um miðjan vetur þar sem taldir eru niður dagarnir í þjóðhátíð. Þjóðhátíð er enda tvímælalaust hápunktur Eyjalífsins.

Eyjamenn eru gestum sínum þakklátir fyrir þá virðingu sem hefðum og hátíð Eyjanna er sýnd. Í raun erum við Eyjamenn alltaf jafn snortnir yfir því hversu tilbúnir þjóðhátíðargestir eru til að koma og taka þátt í þessari hátíð á forsendum okkar og upplifa menningu eyjanna með sín hvítu tjöld, reyktan lunda, gítarspil, brennu og flugeldasýningu, af prúðmennsku. Það eina sem stundum hefur angrað okkur eru fréttir af því að örfáir hafi þurft að gista fangageymslur vegna ölvunar eða smávægilegra pústra. Fréttin er einmitt frekar sú að 10 til 12.000 manns skemmti sér hér konunglega án þess að lögreglan þurfi að hafa af þeim afskipti.

Það er til marks um styrk þjóðhátíðar að allar aðrar bæjarhátíðir á landinu reyna með einum eða öðrum hætti að líkja eftir þjóðhátíð og er það vel. Eftirlíkingar komast þó aldrei nærri fyrirmyndinni enda umgjörð Herjólfsdals, rómantík Eyjanna og litafegurð mannlífsins algerlega einstök. Höfuðáhersla er ætíð lögð á öryggi gesta. Markmiðið er að á hverju ári fari gestir sem hingað koma til baka með jákvæðar minningar um Vestmannaeyjar og aukinn skilning á því sérstaka samfélagi sem hér er.

Vestmannaeyjabær mun gera allt sem í hans valdi stendur til að gera dvöl gesta ánægjulega og standa við bakið á þjóðhátíðarnefnd í því að gera öllum kleift að fanga hátíðarandann og skemmta sér vel. Fyrir hönd Vestmannaeyjabæjar býð ég gesti velkomna á þjóðhátíð í Vestmannaeyjum. Gleðilega Þjóðhátíð.

Höfundur er bæjarstjóri í Vestmannaeyjum.