Lescott efstur á óskalista Man. City

Knattspyrnustjórinn Mark Hughes hjá Manchester City er sagður vera tilbúinn að mæta 20 milljón punda verðmiða Everton á varnarmanninum Joleon Lescott sem kom til Liverpoolborgarfélagsins á aðeins 4 milljónir punda árið 2006.

Lescott hefur verið með betri varnarmönnum ensku úrvalsdeildarinnar undanfarin ár og hefur unnið sér sæti í landsliðshópi Engalands fyrir vikið en samkvæmt heimildum Sky Sports fréttastofunar er óvíst hvort hinn 26 ára gamli Lescott vilji yfir höfuð yfirgefa Goodison Park-leikvanginn.

Ef félagsskipti Lescott falla upp fyrir eru forráðamenn City sagðir ætla að einbeita sér að því að fá varnarmanninn Kolo Toure frá Arsenal en hann á aðeins eitt ár eftir af samningi sínum við Lundúnafélagið og Arsenal gæti freistast til þess að selja hann ef gott kauptilboð berst í leikmanninn.