Ekki frumvarp um að reka mig segir Davíð

Bankastjórar Seðlabankans telja að Davíð Oddsson þurfi ekki að víkja sem formaður bankastjórnarinnar þótt frumvarp sem kveður á um breytingar á yfirstjórninni verði að lögum. Bankastjóraembættið sem kveðið er á um í frumvarpinu sé í raun sama embætti og formaður bankastjórnar. Starfið þurfi því ekki að auglýsa að nýju.

Bankastjórarnir hafna þar með viðhorfum stjórnarliða, en fyrir liggur að einn megintilgangurinn með frumvarpi forsætisráðherra er að koma bankastjórninni frá, eins og forsprökkum nýrrar ríkisstjórnar hefur orðið tíðrætt um að þurfi að gera.

Umsögn bankastjóranna tveggja, Davíðs og Eiríks Guðnasonar, um frumvarpið var gerð opinber í gær. Í henni gagnrýna þeir nær öll atriði frumvarpsins, segja það afar ófullkomið, villandi, ruglingslegt og ógagnsætt, auk þess sem þeir segja greinina um að núverandi bankastjórn skuli víkja hafa á sér „einkar ógeðfelldan brag“. Fyrirbyggja þurfi að úr frumvarpinu verði „stjórnsýslubastarður“.

Þá segir einnig í umsögninni að Alþjóðagjaldeyrissjóðurinn hafi staðfest við forsætisráðuneytið að Davíð Oddsson sé hæfur til að gegna starfi seðlabankastjóra.

Davíð og Eiríkur komu fyrir viðskiptanefnd Alþingis í gærmorgun og svöruðu fyrirspurnum um athugasemdir sínar við frumvarpið. Mun fundurinn hafa verið hinn vinsamlegasti. Ingimundur Friðriksson, sem nýverið lét af starfi seðlabankastjóra að áeggjan Jóhönnu Sigurðardóttur forsætisráðherra, mætti til fundarins á undan þeim og gerði grein fyrir sínum athugsemdum.

Ekki tókst að afgreiða frumvarpið úr nefndinni í gærmorgun eins og hugur stjórnarliða hafði staðið til. Aukafundur hefur verið boðaður í nefndinni í dag.