Háskalegur hégómleiki

Hégómleiki er hættulegur eiginleiki. Sá sem þekkir hvar hégómleiki annars manns liggur getur stjórnað honum næstum að vild. Erfitt er að finna sjálfur hvar hégómleiki manns er. Þess vegna er hégómleikinn svo háskalegt stjórntæki sem raun ber vitni. Stjórnmálamenn ættu að kryfja sjálfa sig á vægðarlausan hátt til þess að komast að uppsprettu hégómleika síns, þá er ekki hægt að komast að þeim bakdyramegin.

Einkum er mikilvægt að rugla ekki saman hégómleika og samvisku og heiðarleika. Síðustu daga hefur sjónarspil á vettvangi stjórnmálanna sýnt gott dæmi um þetta. Ráðherra yfirgefur ríkisstjórn og fullyrðir við fréttamenn að hann hafi ekki verið beittur neinum þrýstingi. Fáum dögum seinna snýr hann við blaðinu og fullyrðir að hann hafi verið beittur þrýstingi. Hvort er satt?

Þeir sem taka að sér að höndla með annarra mál, eins og ríkisstjórn gerir fyrir alþýðu manna í kjölfar kosninga, verða að gera sér ljóst að súpa verður fleira en sætt þykir. Í lífinu koma upp hjá hverjum og einum mál sem umdeilanlegt er hvernig leysa eigi. Þetta á ekki síður við um þá sem leysa verða erfið verkefni á opinberum vettvangi. Lsusn Ícesawemáls er lykill að mikilvægum lífshagsmunum Íslendinga. Ríkisstjórn skrifar undir samning um hvernig leysa eigi þetta mál og miklu varðar að hann verði efndur. Það er hart ef hégómlegar píslarvættistilhneigingar eins stjórnmálamanns og samúðarfullra áhangenda hans koma í veg fyrir að landsmenn eigi til hnífs og skeiðar næstu árin. Þau ár ættu fremur að markast af lausn mála með ráðdeild en endalausum sjálfhverfum íhugunum hégómlegra stjórnmálamanna. Það er mikilvægt að leysa þetta mál fljótt, af skynsemi og án sjálfhverfrar tilfinningasemi.

Að tilteknir stjórnmálamenn haldi andliti er smámál miðað við að koma hér á viðunandi lífskjörum. Íslendingar hafa löngum lagt mikið á sig fyrir sæmd fjölskyldunnar, nú er sæmd allrar þjóðarinnar að veði. Þingmenn - hugsið um sæmdina, hlaupist ekki frá hálfnuðu verki vegna stundarhagsmuna ykkar sjálfra. Slíkt ráðslag getur kostað ykkur sjálfa sæmdina þegar upp er staðið. Það liggur á endanum hver eins og hann hefur um sig búið.

Höfundur er blaðamaður og rithöfundur.