Brunuðu yfir Frakkana og inn í undanúrslit

Róbert Gunnarsson og félagar í Gummersbach eru komnir í undanúrslit í Evrópukeppni félagsliða í handbolta eftir yfirburðarsigur á franska liðinu Ivry.

Gummersbach vann seinni leikinn með 17 marka mun, 41-24, í Þýskalandi og því leikina tvo samanlagt með 23 marka mun, 74-51.

Róbert Gunnarsson átti mjög góðan leik og var markhæstur í liði Gummersbach með 7 mörk.

Spænska liðið CAI BM. Aragon og RK Gorenje frá Slóveníu eru einnig komin áfram í undanúrslit en TSV St. Otmar frá Sviss og Zarja Kaspija Astrakhan mætast í seinni leiknum í Rússalandi í dag. Svissneska liðið hefur fjögurra marka forskot frá því í fyrri leiknum.