Ginobili úr leik hjá San Antonio

NBA-lið San Antonio Spurs hefur orðið fyrir gríðarlegu áfalli nú rétt fyrir úrslitakeppni. Ökklameiðsli Argentínumannsins Manu Ginobili hafa tekið sig upp að nýju og hefur þegar verið úrskurðaður úr leik í deild og úrslitakeppni.

Þessi sömu ökklameiðsli háðu Ginobili einmitt mikið í úrslitakeppninni fyrir ári, en þvert á óskir forráðamanna San Antonio fór þessi öflugi leikmaður með Argentínu á Ólympíuleikana. Þar tóku meiðslin sig upp að nýju og hafa háð honum í allan vetur þó hann hafi farið í uppskurð.

Þetta er mikið reiðarslag fyrir San Antonio, en Ginobili hefur verið algjör lykilmaður í þremur meistaraliðum Spurs árin 2003, 2005 og 2007.