Hagnaður ríkisins af Glitni 119 milljarðar

Hagnaður ríkisins á 75 prósenta hlut sínum í Glitni nam eftir kauphallarviðskipti gærdagsins 119,3 milljörðum króna. Að sama skapi má segja að hluthafar bankans frá því fyrir helgi hafi tapað tæplega 166 milljörðum króna.

Gengi bréfa í bankanum féll um rúmlega 71 prósent í viðskiptum gærdagsins, úr 15,7 krónum á hlut á föstudag og í 4,55 krónur á hlut. Lokað var fyrir viðskipti með bréf félagsins á mánudag.

Töluverð viðskipti áttu sér stað í gær með bréf Glitnis, eða fyrir rúmar 2.085 milljónir króna. Nokkur sveifla var á gengi bréfanna, en viðskipti með þau hófust þó töluvert yfir metnu kaupgengi ríkisins, sem var nálægt 1,9 krónum á hlut.

Fyrstu viðskipti voru rétt undir fimm krónum á hlut, en hæst fór gengið í 6,50 krónur. Þá fór hagnaður ríkisins á pappír í 206 milljarða króna. Ríkið setti á mánudag nýtt hlutafé fyrir 84 milljarða króna í Glitni og eignaðist þar með þrjá fjórðu hluta bankans.