Almenningur væntir 12% verðbólgu næsta árið

Væntingar almennings eru á þann veg að verðbólga næstu tólf mánaða verði 12% samkvæmt könnun Capacent Gallup en niðurstöður hennar voru birtar í Hagvísum Seðlabankans fyrir septembermánuð. Könnunin var framkvæmd í ágúst.

Fjallað er um málið í Morgunkorni greiningar Glitnis. Þar segir að verðbólguvæntingar almennings hafa samkvæmt þessu aukist síðsumars en í síðustu könnun sem framkvæmd var í maí og júní vænti almenningur 10% verðbólgu á næstu tólf mánuðum.

Þá hafa verðbólguvæntingar almennings snarversnað frá því fyrir ári síðan þegar almenningur vænti 4% verðbólgu á næstu tólf mánuðum. Ekki þarf að koma á óvart að væntingar almennings um verðbólguþróun hafi versnað á tímabilinu en væntingarnar fylgja oftast nær mældri verðbólgu.

Verðbólga hefur aukist jafnt og þétt undanfarna mánuði samhliða veikingu krónunnar. Tólf mánaða verðbólga stendur nú í 14%.