Bjarni til liðs við fjárfesta í Ameríku

Bjarni Ármannsson fjárfestir og Norðmaðurinn Frank Ove Reite hafa gengið til liðs við einkaframtakssjóðinn (e. private equity) Paine & Partners í Bandaríkjunum, að því er sjóðurinn tilkynnir í dag.

Frank Reite var áður framkvæmdastjóri hjá Glitni þar sem Bjarni var forstjóri. Hlutverk Bjarna og Franks innan sjóðsins verður að stýra fjárfestingum í Norður-Evrópu með sérstaka áherslu á sjávarútveg, orkuiðnað og fjármálaþjónustu.

Í viðtali við Markaðinn í dag kveðst Bjarni um skeið hafa haft það á bak við eyrað að hefja samstarf um fjárfestingar við fjárfestingarbanka eða einkaframtakssjóð. W. Dexter Paine, stofnandi Paine & Partners, segist í tilkynningu himinlifandi að fá þá Frank og Bjarna til liðs við sjóðinn.

„Mörg okkar hafa verið þeirrar ánægju aðnjótandi að vinna náið með þeim,“ segir hann og rekur kynnin við þá um áratug aftur í tímann þegar þeir voru báðir starfandi hjá Glitni.

Paine & Partners var stofnaður árið 1997 og er með aðsetur í San Francisco og New York. Bjarni segir sjóðinn afar öflugan, en frá stofnun hefur hann fjárfest fyrir tæplega sex og hálfan milljarð Bandaríkjadala í félögum í ýmsum atvinnugreinum.

„Ávöxtun á það eigið fé sem í þeim fjárfestingum hefur verið bundið hefur að jafnaði verið 33 prósent á ári,“ segir hann. Paine & Partners fjárfestir nú úr sjóði sem nefnist Paine & Partners III og er um 1.200 milljónir dala að stærð, en það er pottur upp á tæpa níutíu milljarða íslenskra króna.

Bjarni segir ekki loku fyrir það skotið að samstarfið verði ákveðinn farvegur fyrir aukna erlenda fjárfestingu hér á landi. „En hvar okkur ber nákvæmlega niður verður auðvitað bara að koma í ljós,“ segir hann.

Auk þess að ræða samstarfið við Paine & Partners fer Bjarni yfir horfur í efnahagsmálum í viðtalinu í miðopnu blaðsins. Hann segir ljóst að krónan hafi glatað trausti bæði innanlands og utan og brýnir stjórnvöld til aðgerða í efnahagsmálum til að efla traust erlendra greiningaraðila og fjárfesta.

Hann segir ríða á að gjaldeyrisforðinn verði efldur og að þjóðinni verði mörkuð stefna til farsællar framtíðar. Hann segir þar sjálfsagt fleiri en eina leið færa, en ljóst sé að hraða þurfi mjög þeirri vinnu.

„Maður sér að sjálfsögðu hvernig umræðan um Evrópusambandið er að taka á sig nýja mynd; margir sjá það sem lausnarfarveg núna og það má vel vera.“