Tchenguiz selur sex hótel til að létta á skuldastöðunni

Fasteignamógúllinn Robert Tchenguiz, stjórnarmaður í Exista þar sem hann á 5% hlut, hefur selt sex hótel til að létta aðeins á skuldastöðu sinni.

Hótelkeðjan Travelodge keypti hótelin af Tchenguiz á 85 milljónir punda eða sem nemur rúmlega 12 milljörðum kr. Ætlar keðjan síðan að eyða 14 milljónum punda í endurbætur á hótelunum.

Tchenguiz hefur orðið hart úti í lausafjárkreppunni undanfarna mánuði. Í blaðinu the Guardian er fjallað um hótelsöluna og þar segir að Tchenguiz hlægi að þeim orðrómi að hann hafi neyðst til þess að selja lúxussnekkju sína og aðrar fjölskyldueignir.