Út­litið ekki allt of gott í kjara­deilu flug­virkja

Flugvirkjafélag Íslands (FVFÍ) tilkynnti Icelandair að flugvirkjar félagsins sem starfa hjá fyrirtækinu muni hefja ótímabundnar verkfallsaðgerðir miðvikudaginn 23. september næstkomandi, eftir rúma viku. Atkvæðagreiðsla um vinnustöðvun hófst á föstudag og lauk í gær. 92 prósent tóku þátt og að 88,3 prósent þeirra sem greiddu atkvæði samþykktu vinnustöðvunina. Kjarasamningar hafa verið lausir frá því um áramótin en viðræður hafa verið í gangi síðan í nóvember á síðasta ári.

Í september eru áætlunarflug Icelandair um 110 talsins á dag og fjöldi farþega um fimmtán þúsund. Ljóst er að verkfall getur þannig haft áhrif á fjölda fólks.

„Akkúrat núna ber mjög mikið milli samningsaðila, því miður, og útlitið ekki allt of gott,“ segir Bjarni og að ekki sé útlit fyrir að hægt verði að brúa þá gjá sem sé á milli samningsaðila á þessari rúmu viku sem er til stefnu.

„Hérna er um það að ræða að Icelandair metur kostnaðaráhrifin af þeirri kröfu sem er uppi um launahækkanir upp á um 25 til 30 prósent á þessum tveimur árum og það er svo langt fyrir utan það sem félagið telur að hægt sé að réttlæta,“ segir Bjarni.

Kröfur samrýmist illa

Ef þetta sé sett í samhengi við annað sem sé í gangi á vinnumarkaði, það er forsendubrest almennra kjarasamninga, þá sé merkilegt að stéttarfélög séu annars vegar með háværar kröfur um að fyrirtækin í landinu haldi aftur af sér til þess að styðja við lækkun verðlags og hins vegar séu þau með kröfur upp á 25 til 30 prósenta hækkun á kostnaði.

„Þetta samrýmist nú afskaplega illa,“ segir Bjarni og að þessar kröfur séu ekki í neinum takti við eðlilega launaþróun á Íslandi, og ekki síst við þær aðstæður sem séu uppi núna, eða fyrir fyrirtækið í þeirri alþjóðlegu samkeppni sem það er í.

Spurður hvort flugvirkjar og flugmenn, sem einnig eru í viðræðum hjá sáttasemjara, séu erfiðir hópar til að semja við segist hann ekki geta sagt til um það en það sé tilefni til að hafa áhyggjur af samkeppnishæfni flugrekstrar á Íslandi og almennt hafi samkeppnishæfni íslenskra fyrirtækja dalað undanfarin misseri. Vextir hafi verið í hæstu hæðum í þrjú ár og hagvöxtur afskaplega takmarkaður, launahlutföllin há og kröfur um þau hækki.

Geri umbætur í sameiningu

Bjarni segir Samtök atvinnulífsins kalla eftir því að vinnumarkaður og stjórnvöld taki höndum saman og geri umbætur á íslenska vinnumarkaðsmódelinu. Það séu allar aðstæður á Íslandi til að tryggja launþegum há laun og sterkan kaupmátt en það sé verið að framleiða verðbólgu með því að vera með „lausbundið fyrirkomulag“ um þróun launa frá einum tímapunkti til annars.

„Virðumst ekki geta komið auga á það og ekki getað komið okkur saman um það hvernig við getum gert betur.“