De Graafschap vill halda Arnari

Hollenska úrvalsdeildarliðið De Graafschap hefur hug á því að halda Arnari Þór Viðarssyni í sínum röðum ef liðinu tekst að forða sér frá falli.

Arnar er í láni hjá félaginu frá öðru liði í deildinni, FC Twente, út þetta tímabil.

„Þetta er ekki ráðið því við erum ekki enn búnir að tryggja okkur áframhaldandi sæti í deildinni. Það eina sem ég veit fyrir víst er að De Graafschap vill halda mér."

„Ef liðið fellur hef hvorki ég áhuga á að spila í næstefstu deild né heldur hefur félagið efni á því að kaupa leikmenn," sagði Arnar í samtali við Vísi.

Hann segist þó gjarnan vilja vera áfram hjá liðinu ef það heldur sæti sínu í deildinni.

„Þetta er mjög fínn klúbbur og mjög vel rekinn. Þetta er félag sem átti í fjárhagsvandræðum fyrir nokkrum árum en hefur nú komið sér út úr þeim vandræðum. Það er alltaf fullt á vellinum og okkur fjölskyldunni líður vel. Ég er nú orðinn þrítugur og því fyrst og fremst að hugsa um framtíðina og fjölskylduna. Ég gæti því vel hugsað mér að vera hér áfram enda er ég löngu hættur að leita eftir frægð og frama," sagði hann í léttum dúr.

Aðeins ein umferð er eftir af deildinni en De Graafschap er sem stendur í sextánda og þriðja neðsta sæti.

Neðsta liðið fellur beint niður í næstefstu deild en liðin í sextánda og sautjánda sæti þurfa að taka þátt í umspili ásamt sex liðum úr næstefstu deildinni um tvö sæti í úrvalsdeildinni.

Sú umspilskeppni er spiluð í þremur umferðum en liðin tvö úr úrvalsdeildinni taka ekki þátt í fyrstu umferðinni. Þar keppa liðin sem lentu í 6.-9. sæti B-deildarinnar innbyrðis með útsláttarfyrirkomulagi, heima og að heiman.

Liðin tvö úr úrvalsdeildinni koma inn í næstu umferð ásamt liðunum sem urðu í 2.-5. sæti í B-deildinni og sigurvegurunum tveimur úr fyrstu umferðinni.

Sigurvegarar leikjanna fjögurra úr annarri umferð mætast svo í þriðju umferð þar sem þau tvö lið sem standa uppi sem sigurvegarar þar keppa í úrvalsdeildinni á næsta keppnistímabili.

De Graafschap á þó ágætan möguleika á því að sleppa við þessa umspilskeppni ef þeir vinna leik sinn í lokaumferð deildarinnar um helgina.

De Graafschap mætir þá VVV Venlo sem er í neðsta sæti deildarinnar. VVV mun þó örugglega leggja allt í leikinn þar sem liðið gæti með sigri farið upp úr botnsæti deildarinnar, ef Excelsior vinnur ekki sinn leik gegn Heerenveen.

Excelsior er í næstneðsta sæti deildarinnar með 27 stig, einu meira en VVV en tveimur á eftir De Graafschap.

De Graafschap getur með sigri lyft sér upp í annað hvort fjórtánda eða fimmtánda sæti deildarinnar.

Í fimmtánda sæti er Willem II með 31 stig, einu meira en De Graafschap, en liðið mætir einmitt FC Twente í lokaumferðinni.

Liðið í fjórtánda sæti, Heracles, á einnig afar erfiða viðureign fyrir höndum í lokaumferðinni en liðið er með 32 stig. Það mætir Ajax í lokaumferðinni en Ajax á enn fræðilegan möguleika á því að ná toppliði PSV að stigum.