NBA: Philadelphia skellti Detroit

Fjórir leikir fóru fram í fyrstu umferð úrslitakeppninnar í NBA deildinni í nótt. Óvæntustu úrslitin urðu í Detroit þar sem Philadelphia skellti heimamönnum 90-86 í fyrsta leik liðanna.

Leikmenn Detroit eiga það stundum til að vera of góðir með sig og fengu að kenna á því í nótt. Liðið var 15 stigum yfir á kafla í 2. leikhlutanum, en gestirnir náðu með hörku að tryggja sér sigur í lokin.

Andre Miller skoraði 20 stig fyrir Philadelphia, Willie Green 17 og Andre Iguodala 16 stig, hirti 9 fráköst og gaf 8 stoðsendingar.

Easheed Wallace skoraði 24 stig, hirti 9 fráköst og varði 7 skot fyrir Detroit og Chauncey Billups skoraði 14 stig en fór illa að ráði sínu undir lok leiksins þar sem hann klikkaði m.a. illa á vítalínunni.

Tölfræðin

Gasol frábær í sigri Lakers

LA Lakers vann góðan sigur á Denver á heimavelli sínum í fyrsta leik liðanna 128-114. Pau Gasol átti sannkallaðan stórleik í liði Lakers. Hann skoraði 36 stig, hitti úr 14 af 20 skotum sínum, hirti 16 fráköst og gaf 8 stoðsendingar. Kobe Bryant skoraði megnið af 32 stigum sínum undir lok leiksins og Lamar Odom bætti við 17 stigum og 14 fráköstum.

Þeir Allen Iverson og Carmelo Anthony skoruðu sitt hvor 30 stigin fyrir Denver og Linas Kleiza skoraði 23 stig af bekknum.

Tölfræðin

Howard öflugur í sigri Orlando

Orlando vann sigur á Toronto í fyrsta leik liðanna í úrslitakeppninni. Orlando vann fyrsta leikhlutann 42-23 og lagði þar með grunninn að sigrinum, en þessi leikur fór fram á heimavelli Orlando.

Dwight Howard var skæður í liði Orlando og skoraði 25 stig, hirti 23 fráköst og varði 5 skot, Jameer Nelson skoraði 24 stig og Hedo Turkoglu skoraði 21 stig.

Hjá Torontoo var Anthony Parker stigahæstur með 24 stig, Chris Bosh var með 21 stig og Jason Kapono 18 stig.

Tölfræðin

Auðvelt hjá Boston

Loks vann Boston mjög auðveldan 104-81 sigur á Atlanta á heimavelli sínum. Mikil flugeldasýning var fyrir leikinn í Garðinum í Boston og reykjarmökk lagði yfir völlinn fyrstu mínúturnar. Sýningin hélt svo áfram inni á vellinum og var Boston búið að gera út um hann fljótlega í síðari hálfleiknum.

Byrjunarliðsmenn Boston áttu náðugan dag og spiluðu ekki meira en 35 mínútur. Ray Allen skoraði 18 stig, Paul Pierce og Kevin Garnett skoruðu 16 stig og Rajon Rondo 15.

Al Horford átti skínandi leik hjá Atlanta með 20 stig og 10 fráköst og Joe Johnson skoraði 19 stig, en ljóst er að Atlanta á erfiða daga fyrir höndum gegn sterku liði Boston.

Tölfræðin