Draugarnir flytja ekki með

Veitingahúsa- og sjoppu­menning Hrútafjarðar tekur nú algjörum stakkaskiptum. Búið er að rífa Brú og nýr Staðarskáli verður opnaður vestanmegin í firðinum á fimmtudaginn. Nú fer því hver að verða síðastur að sækja hinn sögufræga Staðar­skála heim.

Kokkurinn Sveinn Friðfinnsson segir mikinn söknuð að gamla staðnum. „Ég kom hingað fyrst fyrir einum þrjátíu árum, en hef unnið hér í ein tólf ár, minnir mig. Mér þykir leitt að kveðja gamla staðinn, en það eru nú svo sem ekki allir jafn gamaldags og vitlausir og ég."

Sveinn segist fylgja með yfir ána. „Ég er búinn að skoða nýja staðinn og líst vel á. Ég á ekki von á að það verði neinar meiri háttar breytingar á matseðlinum. Það hefur gefist vel að bjóða upp á þrjár tegundir af heimilismat. Kúnnunum líkar það vel, ég er einmitt að horfa á einn núna sem er að hesthúsa hálft kíló af plokkfiski með bestu lyst. Það er nýr matseðill á hverjum degi."

Sveinn segir stundum koma fyrir að fjórir réttir séu á matseðlinum, ef hann vaknar þannig stemmdur. „Vaktirnar eru góðar og ég sef í kjallaranum, einn í húsinu. Eða ekki alveg einn. Það eru góðar vættir með mér, sumir myndu kalla það drauga. En ég er hræddur um að ég fái þá ekki til að flytja í nýja húsið."

Stöðvarstjórinn Kristinn Guðmundsson segir nýja staðinn munu heita N1 - Staðarskáli. „Verslunin verður eins og Nestis-verslanirnar í Reykjavík en veitingasalan verður svipuð og hún hefur verið, nema við bætum einhverju við, til dæmis pitsum."

Kristinn segir að ekki hafi verið tekin ákvörðun um það hvaða starfsemi fari fram í gamla Staðarskála. Aðeins eitt er víst: Nýi Staðarskáli verður opnaður á slaginu klukkan átta á fimmtudagsmorguninn.