Íslenskir dópistar reiðir yfir okri

Ábendingunum rignir yfir Okursíðu Dr. Gunna þessa dagana, enda kreppan og gengishrunið á allra vörum. Flestar eru ábendingarnar um nauðsynjavörur og hversdagslega hluti. Hvað flokkast undir nauðsynjavörur er svo misjafnt eftir mönnum.

„Þegar Kristanía var og hét, var hægt að fá gramm af ágætis toppum, "böddum," "Skúnk," fyrir 50 krónur danskar. Íslenskir ræktendur og smásalar eru að selja grammið af grasblönduðum skúnk á 3000-3500 krónur. Er þetta ekki okur?" Spyr sá sem ritar okurábendingu #439. Hann heldur áfram og segir kókaín bæði hræódýrt og hreint í Suður-Ameríku, hér kosti það fúlgur fjár og sé bæði útþynnt og lélegt. Spítt kosti alltaf fimm þúsund krónur grammið hér á landi, og gildi þá einu hver gæðin séu.

„Íslenskir dópsalar eru mestu okrarar í heimi," segir færsluritari að lokum. Doktorinn ritar athugasemd við færsluna, þar sem hann segir að það ætti líka að setja þá alla í steininn. Gleðin sé besta víman, og það séu bara aumingjar og hálfvitar sem neyti eiturlyfja, fyrir utan náttúrulega þau sem ríkið selur.