Flaggari handtekinn í Alþingishúsinu í gær

Annar þeirra sem flaggaði Bónusfána á Alþingishúsinu í mótmælum fyrir hálfum mánuði var handtekinn í gærkvöldi. Lögregla greip manninn þar sem hann var í vísindaferð með háskólafélögum á Alþingi. Honum var umsvifalaust gert að afplána eldri dóm án lögbundins fyrirvara og það degi fyrir boðuð mótmæli í miðbænum.

Tveir menn drógu Bónusfána að húni á Alþingishúsinu í mótmælum tíunda nóvember. Annar var handtekinn en hinn slapp. Sá var í vísindaferð í þinghúsinu í gær með samnemendum í Háskóla Íslands. Kennsl voru borin á hann og lögregla kölluð til. Maðurinn var þegar handtekinn og strax færður til afplánunar vegna eldri dóms frá 2006. Þá hafði maðurinn klifrað upp í krana á Kárahnjúkum í virkjunarmótmælum. Hann kaus frekar að afplána átján daga í fangelsi en að borga sekt.

Móðir mannsins staðfesti í samtali við fréttastofu í morgun að hann hafi verið kallaður til afplánunar í ágúst í fyrra en á fimmta degi hafi þeirri afplánun óvænt verið frestað svo hægt yrði að koma öðrum mótmælanda að í afplánun. Manninum hafi verið tjáð að afplánun hans yrði lokið síðar.

Síðan hafi engin slík tilkynning borist og segir móðir mannsins að afplánunina hafi borið mjög brátt að - sér í lagi í ljósi þess að í dag séu boðuð mótmæli í miðbænum vegna efnahagsástandsins sem sonur hennar hefði tekið þátt í.

Samkvæmt lögum skal afplánun hefjast eftir bréflega tilkynningu og með minnst þriggja vikna fyrirvara. Þó megi hefja afplánun án fyrirvara fremji viðkomandi dómþoli refsivert afbrot í millitíðinni, reyni að koma sér undan refsingu eða almannahagsmunir mæli með því. Samkvæmt lögum skal afplánun vera samfelld.

Ragnar Aðalsteinsson, hæstaréttarmaður, segir vart lagaheimild fyrir því að slíta afplánun í sundur líkt og gert hafi verið í þessu máli. Slíkt verði að skoða en það geti valdið fólki ómældum spjöllum. Hann segir rannsóknarvert hversu brátt afplánunin nú hafi borið að.

Lögregla vildi ekki tjá sig um málið þegar eftir því var leitað í morgun.