Tilboð Greens stendur enn

Tilboð breska auðmannsins Philip Green um að kaupa skuldir Baugs í íslensku bönkunum stendur enn. Þá hefur hann óskað eftir stuðningi frá Gordon Brown, forsætisráðherra Bretlands, við viðskiptin að því er fram kemur í The Times í dag.

Með því að leita eftir stuðningi Brown er Green að reyna að koma í veg fyrir að hann þurfi að kljást við Alþjóðagjaldeyrissjóðinn fari svo að efnahagsstjórn landsins verði í höndum sjóðsins. Samkvæmt heimildum Times telur Green að Alþjóðgjaldeyrissjóðurinn muni þá reyna að taka aftur til baka eignir sem íslensk stjórnvöld hafa selt. Sömu vangaveltur eru sagðar vera uppi á borði hjá þeim þremur fjárfestingarsjóðum sem einnig hafa sýnt áhuga á að kaupa Baug.

Green gaf það út á mánudag að ekkert yrði af kaupunum ef tilboði hans yrði ekki tekið innan tveggja sólarhringa. Nú eru þau tímamörk liðin en aðstoðarkona Green staðfesti það í samtali við fréttastofu að tilboðið stæði enn og hann biði þess nú að heyra frá íslenskum stjórnvöldum.

Þær upplýsingar fengust frá skilanefnd Kaupþings að enn sé verið að fara yfir tilboð Greens og annarra sem hafa sýnt því áhuga að kaupa skuldir Baugs en engu tilboði hafi enn verið tekið.