Alfreð: Mikill heiður og stórkostlegt tækifæri

Alfreð Gíslason sagði í samtali við Vísi í dag að ráðning hans til Þýskalandsmeistara Kiel sé stórkostlegt tækifæri og hápunktur á sínum þjálfaraferli.

„Við vorum að ganga frá þessu og líst mér afar vel á þetta," sagði Alfreð sem skrifaði undir þriggja ára samning við Kiel.

Hann var samningsbundinn Gummersbach til ársins 2010 en Kiel greiddi félaginu 750 þúsund evrur fyrir að losa Alfreð undan samningnum. Auk þess þurfti Kiel að greiða allt að 400 þúsund evrur fyrir að losa gamla þjálfarann, Noka Serdarusic, undan samningi sínum við Kiel.

Alfreð staðfesti fyrri upphæðina í samtali við Vísi en þetta mun vera dýrasta þjálfararáðning í sögu handboltans.

„Það er víst," sagði Alfreð spakur. „En þetta kemur mér í raun ekkert við. Þeir vildu ráða nýjan þjálfara og vildu endilega ráða mig. Þetta er vissulega heiður en ég finn ekki fyrir neinni sérstakri pressu vegna peninganna. Þetta er fyrst og fremst risastórt tækifæri fyrir mig að þjálfa annað af bestu félagsliðum heims."

Kiel varði í vor bæði meistaratitil sinn í þýsku úrvalsdeildinni sem og bikarmeistaratitilinn. Liðið tapaði hins vegar fyrir Ciudad Real í úrslitum Meistaradeildar Evrópu sem er af langflestum talið besta félagsliðs heims ásamt Kiel.

„Þetta er búið að ganga hratt fyrir sig og ég er varla farinn að kveikja á þessu ennþá," sagði Alfreð. „Ég fæ loksins lið í hendurnar sem getur unnið titla. Eins og málin hafa þróast í handboltaheimnum safnast bestu leikmenn heimsins á 2-3 bestu liðin."

„Það er mjög erfitt fyrir önnur lið að brjótast inn í þann flokk. Hjá Gummersbach var ég með lið sem þarf að byggja öðruvísi upp og tekur það ferli lengri tíma. Svo á maður alltaf það á hættu að bestu leikmenn liðsins eru keyptir í burtu þegar vel gengur, eins og gerðist með Daniel Narcisse í fyrra."

„Þetta er vissulega hápunktur á mínum þjálfaraferli. Þetta er stórkostlegt tækifæri fyrir mig og sagan verður að sýna hvað ég gat gert úr því."

Noka Serdarusic var dáður og dýrkaður af mörgum í Kiel og þeirra á meðal er Nikola Karabatic, einn allra besti leikmaður heims. Hann sagði í viðtali við þýska fjölmiðla að sér hafi sárnað mjög meðferð Kiel á Serdarusic sem hafi gengið sér í föðurstað.

Alfreð býst þó ekki við því að ná ekki góðu sambandi við leikmenn. „Ég geri ekki ráð fyrir því. Þetta snýst um handbolta og aðalatriðið er að skila almennilegri vinnu. Ég tel mig hafa sýnt að ég hafi gert það hvar sem ég hef unnið. Það verður svo að koma í ljós hvort það nægir."

Hann segir að leikmannamálin hjá Kiel sé í góðum málum. „Langflestir leikmenn eru samningsbundir til lengri tíma sem er mjög gott mál. Aðalatriðið er að ná samningum við leikmenn eins og Marcus Ahlm sem á eitt ár eftir af samningi sínum."

Alfreð kveður nú Gummersbach rétt eins þeir Sverre Jakobsson og Guðjón Valur Sveinsson. Róbert Gunnarsson er því einn Íslendinganna eftir hjá félaginu.

„Þetta var nú bara tilviljun," sagði Alfreð og hló. „En málið er einfaldlega að það ríkir gríðarleg samkeppni í þessum heimi og sífellt meiri fjármunir í þessari deild. Allir vilja berjast upp toppinn."