67 milljarða króna afgangur hjá hinu opinbera

Tekjuafkoma hins opinbera reyndist jákvæð um 67 milljarða króna í fyrra samkvæmt bráðabirgðatölum Hagstofu Íslands. Þetta svarar til rúmlega fimm prósenta af landsframleiðslu og tæplega ellefu prósenta af tekjum hins opinbera. Til samanburðar var tekjuafkoman jákvæð um 6,3 prósent af landsframleiðslu árið 2006 og tæp fimm prósent árið 2005.

Tekjur hins opinbera reyndust 617,5 milljarðar króna í fyrra og hækkuðu um tæpa 57 milljarða króna milli ára. Sem hlutfall af landsframleiðslu námu þær 48,3 prósentum og hafa ekki verið hærri áður. Mikil hækkun hefur orðið í tekjum hins opinbera frá árinu 2002 þegar þær mældust tæp 42 prósent af landsframleiðslu. Útgjöld hins opinbera námu 551 milljarði króna árið 2007 og hækkuðu um ríflega 63 milljarða króna milli ára.

Nærri 120 milljarðar til heilbrigðismála

Þegar litið er til einstakra geira samfélagsins námu heildarútgjöld til heilbrigðismála rúmlega 117 milljörðum króna, eða rúmum níu prósentum af landsframleiðslu. Þar af var hlutur hins opinbera um 97 milljarðar króna en hlutur heimila 20,5 milljarðar, eða 17,5 prósent af útgjöldunum. Af heildarútgjöldum hins opinbera 2007 runnu 19 prósent til heilbrigðismála.

Til fræðslumála var ráðstafað 106,5 milljörðum króna í fyrra, eða 8,3 prósent af landsframleiðslu. Þar af var fjármögnun hins opinbera um 98 milljarðar króna og hlutur heimilanna 8,7 milljarðar króna, eða 8,2 prósent. Um fimmtungur útgjalda hins opinbera rennur til fræðslumála.