Gummersbach tapaði fyrir Hamburg

Þrír leikir fóru fram í þýsku úrvalsdeildinni í handbolta í kvöld. Flensburg gaf ekkert eftir í toppbaráttunni en Gummersbach tapaði fyrir Hamburg á heimavelli, 35-31.

Guðjón Valur Sigurðsson skoraði sex mörk fyrir Gummersbach og Róbert Gunnarsson tvö. Sverre Andreas Jakobsson lék í vörn liðsins.

Flensburg vann öruggan sigur á Füchse Berlin, 31-23. Einar Hólmgeirsson skoraði fjögur mörk fyrir liðið og Alexander Petersson tvö.

Að síðustu vann Magdeburg sigur á Wetzlar, 33-25.

Kiel er enn á toppi deildarinnar með 44 stig en Flensburg er í öðru sæti með 43 stig. Hamburg er í því þriðja, fjórum stigum á eftir Kiel.

Gummersbach er í sjötta sæti deildarinnar með 31 stig, Magdeburg í tíunda sæti, Wetzlar í því þrettánda og Füchse Berlin í fjórtánda sæti.