Danskur rithöfundur hlýtur Bókmennaverðlaun Norðurlandaráðs

Danski rithöfundurinn Naja Marie Aidt hlýtur Bókmenntaverðlaun Norðurlandaráðs árið 2008 fyrir smásagnasafnið Bavian. Þetta kemur fram í tilkynningu frá Norðurlandaráði.

Í rökstuðningi dómnefndar segir að smásögur hennar, sem eru 15 talsins í bókinni, fjalli um veröld sem svipi til hversdagsleikans. „Naja Marie Aidt skrifar þokkafullan og ískyggilegan raunsæistexta, sem dregur fram undirtóna raunveruleikans, svo lesandinn finnur að hversdagsleikinn hvílir á neti mögulegra hamfara. Það sem tengir smásögur Naja Marie Aidt er lífssýn sagnanna. En kannski einnig eitthvað sem kalla má hnattrænt lífsmyrkur. Því í gegnum bókina rennur straumur, púls, sem bæði er þokkafullur og ískyggilega þungbúinn," segir í tilkynningunni.

Naja Marie Aidt fæddist árið 1963 og hefur skrifað 8 ljóðasöfn, 3 smásagnasöfn, kvikmyndahandrit og nokkur leikrit. Hún er mjög áberandi í sinni kynslóð danskra rithöfunda. Bókmenntaverðlaunin nema 350 þúsundum danskra króna og verða afhent í lok október í tengslum við Norðurlandaráðsþing í Helsinki.