Ég er ekki bara Kani með peninga

Kanadíski körfuboltamaðurinn Steve Nash hjá Phoenix Suns hefur ítrekað að hann hafi mikinn áhuga á að leggja sitt af mörkum hjá uppáhaldsliði sínu Tottenham í ensku úrvalsdeildini. Hann segist þó ekki hafa tíma til þess í augnablikinu.

"Ég hef mikinn áhuga á að leggja mitt af mörkum fyrir klúbbinn, en ég hef nóg á minni könnu í augnablikinu. Ég styð forráðamenn félagsins heilshugar og er mjög hrifinn af því sem þeir eru að gera í dag. Þegar ég ræði við þá er ég meira að spjalla við þá sem vinur en sem viðskiptamaður. Ég er ekki þessi dæmigerði Kani sem er bara að hugsa um peninga, því ólíkt þeim sem komið hafa inn í enska boltann undanfarið, hef ég verið heitur stuðningsmaður Tottenham frá barnæsku því foreldrar mínir eru frá norðurhluta Lundúna," sagði leikstjórnandinn knái í samtali við Daily Mail.

"Mér er alveg sama um peninga. Ég vil bara sjá Tottenham ná árangri og ef það tekst - yrði ég fullkomlega ánægður," sagði Nash, sem hefur oftar en einu sinni verið orðaður við hugsanlega yfirtöku í Tottenham.