Segir Baug hafa bjargað FL Group

Jón Ásgeir Jóhannesson, stjórnarformaður Baugs Group, segir að góður hagnaður verði hjá félaginu eftir síðasta ár þrátt fyrir erfiðleikana sem verið hafa í fjárhagslífi heimsins. Þetta kom fram í hádegisviðtalinu á Stöð 2 í dag.

Jón Ásgeir vill ekki gefa upp hve mikill hagnaðurinn verður þar sem slíkt eigi eftir að kynna fyrir stjórn félagsins. Aðspurður um hvort björgun FL Group og erfiðleikar í smásöluverslunni á Bretlandseyjum hafi ekki sett strik í reikninginn segir Jón Ásgeir meðal annars að erfiðleikarnar í smásöluverslunni hafi að mestu verið í fjölmiðlum.

„Okkar vörumerki á Bretlandseyjum eru velstödd og eftirsótt á öðrum mörkum," segir Jón Ásgeir og bendir á að salan á þessum merkjum hafi aukist í Mið-Austurlöndum og Asíu sem vegi upp minnkandi sölu á Bretlandi.

Tekið verulega til í rekstri FL Group

Hvað FL Group varðar segir Jón Ásgeir að ef Baugur hefði ekki komið að félaginu með þeim hætti sem varð í lok síðasta árs væri FL Group að öllum líkindum ekki til í dag. Hann orðar það sem svo að búið sé að koma FL Group í var. Hins vegar hafi verið ákveðið að taka verulega til í rekstrinum hjá FL Group.

Hvað varðar hinn himinnháa rekstrarkostnað hjá FL Group á síðasta ári, rúmlega sex milljarðar króna, segir Jón Ásgeir að sú upphæð hafi komið sér verulega á óvart. Hann segir að gera hefði mátt miklu betur og að núverandi stjórnendur félagsins muni ekki sætta sig við neitt svipað í framtíðinni.

Og hvað varðar háan starfslokasamning Hannesar Smárasonar segir Jón Ásgeir að um hafi verið að ræða hluta af ráðningarsamningi Hannesar og því ekki hægt annað en að standa við starfslokasamninginn.

Vonbrigði með ákvörðun Seðlabankans

Eins og fram hefur komið í fréttum yfir helgina var Jón Ásgeir spurður út í stöðu bankana. Hann var einnig spurður um hugsanlega sameiningu á bankamarkaðinum hér og þá einkum sameiningu sparisjóðanna við einhvern af stóru bönkunum. Skilja mátti á orðum hans að vel kæmi til greina að sameina sparisjóðina og Glitni en Baugur á stóran hlut í Glitni.

Í umræðum um Evrópubandalagið og krónuna segir Jón Ásgeir að hann skilji ekki þá afstöðu íslenskra stjórnvalda að ætla ekkert að ræða Evrópumálin og hugsanlega sameiningu við Evrópubandalagið á þessu kjörtímabili. Að hans mati er nauðsynlegt að byrja að skoða þetta mál strax svo hægt sé að taka réttar ákvarðnir í framtíðinni.

Hvað krónuna varðar segir Jón Ásgeir að hann hafi orðið fyrir vonbrigðum með síðustu stýrivaxtaákvörðun Seðlabankans, hann hefði viljað sjá lækkunarferli hefjast núna. Jón Ásgeir bendir á að nú sé hættan sú að þegar stýrivaxtalækkunarferlið hefjist verði það mjög bratt.

„Það er ekki traustvekjandi að þurfa að lækka þessa vexti um eitt til tvö prósent í einu," segir Jón Ásgeir og bendir jafnframt á að ef slíkt gerist muni krónubréfaútgáfan fjúka út um gluggan með tilheyrandi veikingu krónunnar.