Erum ekki að fara að selja Sterling

Pálmi Haraldsson, stjórnarformaður Northern Travel Holding, sem á meðal annars danska flugfélagið Sterling vísar því algjörlega á bug að stefnt sé á sölu á Sterling á næstunni líkt og kom fram í danska viðskiptablaðinu Börsen í dag. FL Group gerir það sömuleiðis í fréttatilkynningu sem send var Vísi.

"Við erum ekki að fara að selja félagið heldur byggja það upp og efla undirstöðurnar," segir Pálmi í samtali við Vísi.

Northern Travel Holding er í eigu Fons (44%), FL Group (34%) og Sund (22%). Auk Sterling á félagið Iceland Express, 51% hlut í breska leiguflugfélaginu Astraeus, 29,26% hlut í sænsku ferðaskrifstofunni Ticket sem skráð er á sænska hlutabréfamarkaðinn og allt hlutafé í dönsku ferðaskrifstofunni Hekla Travel.

Athugasemd FL Group vegna fréttar á Vísi.is um frétt Börsen:

FL Group vísar á bug fullyrðingum í frétt Börsen þess efnis að FL Group sé að undirbúa sölu á Sterling. Í frétt Börsen er snúið út úr orðum Jóns Sigurðssonar, forstjóra FL Group, sem aðspurður um hvort hann teldi að FL Group yrði enn meðal hluthafa í Sterling eftir 5 ár, sagðist hann telja líklegt að innan fimm ára væru komnir nýjir hluthafar að Sterling. Það þýðir ekki að FL Group sé að undirbúa sölu á Sterling.

Einnig skal tekið fram Sterling er ekki í beinni eigu FL Group, heldur norræna ferðaþjónustufyrirtækisins Northern Travel Holding, sem einnig á Iceland Express og Astraeus að fullu leyti, ásamt hlutum í ferðaskrifstofum í Svíþjóð og Danmörku. Eignarhlutur FL Group í NTH er 34%.