Hagnaður SPRON 3,3 milljarðar eftir skatta

SPRON hagnaðist um 3,3 milljarða eftir skatta árið 2007 en þetta kemur fram í uppgjöri fyrirtækisins sem birt var í dag. Guðmundur Hauksson, forstjóri SPRON segir afkomuna vera vel viðundandi í ljósi mikilla lækkana á hlutabréfamörkuðum.

Arðsemi eigin fjár eftir skatta var 11,5 prósent á árinu og hrenar rekstrartekjur námu 9,2 milljörðum króna. Afkoma grunnrekstrar var 4,9 milljarðar króna með 17,1% arðsemi eigin fjár fyrir skatta og innlán voru 53 prósent af heildarútlánum SPRON til viðskiptamanna. Þá kemur fram að innlánaaukning frá 2006 hafi numið 51 prósenti.

Eigið fé SPRON í lok árs nam 27,8 milljörðum króna og eiginfjárhlutfall (CAD) samstæðunnar í lok tímabilsins var 13,4%.

Í uppgjörinu kemur einnig fram að lausafjárstaða sé sterk, engin stærri lán séu á gjalddaga fram til september 2009.

,,Grunnrekstur SPRON hefur styrkst á árinu og fara vaxta- og þóknanatekjur hækkandi," segir Guðmundur Hauksson, forstjóri SPRON. „Innlán hafa aukist um 51% og fjármagna bæði SPRON sparisjóður og Netbankinn sig alfarið með innlánum en fyrir samstæðuna í heild nema innlán 53% af heildarútlánum til viðskiptavina. Lausafjárstaða félagsins er sterk og aðeins eitt langtímalán er á gjalddaga árið 2008 fyrir um 20 milljónir evra sem hefur þegar verið fjármagnað."

Guðmundur segir að lækkun á verðmæti Exista hafi óveruleg áhrif á eiginfjárgrunn samstæðunnar. „Á árinu 2008 er ætlunin að vinna að frekari samþættingu í kjölfar þess vaxtar sem einkennt hefur reksturinn undanfarin ár. Um leið er ætlunin að draga úr kostnaði og hagræða í rekstri. Við erum því mjög vel í stakk búin til þess að mæta þeim erfiðu aðstæðum sem nú eru uppi á fjármálamörkuðum og nýta þau tækifæri sem munu skapast," segir Guðmundur Hauksson.