Skilanefndarmenn fá um 265.000 krónur í mánaðarlaun

Nefndarmenn hinna svokölluðu skilanefnda sem falin var stjórn Landsbanka Íslands, Glitnis og Kaupþings fá greiddar rúmlega 265.000 krónur á mánuði fyrir störf sín. Samkvæmt upplýsingum frá Fjármálaeftirlitinu eru nefndarmenn starfsmenn eftirlitsins samkvæmt tímabundnum ráðningasamningum sem við þá hafa verið gerðir.

Jafnframt eru gerðir verksamningar við vinnuveitendur skilanefndarmanna, t.d endurskoðunarfyrirtæki, sem gera stofnuninni reikninga vegna annarrar vinnu eða álags skilanefndarmanna eða starfsmanna þeirra.

Starfskjör nefndarmanna miðast við 15.launaflokk - 8.þrep kjarasamnings stéttarfélags viðkomandi. Í tilfelli nefndarmanna skilanefndanna er um að ræða kjarafélag viðskipta- og hagfræðing annarsvegar og stéttarfélag lögfræðinga hinsvegar.

Samkvæmt upplýsingum úr launatöflum viðkomandi félaga eru mánaðartekjur í umræddum launaflokki 530.467. Samkvæmt upplýsingum Fjármálaeftirlitsins fá nefndarmenn 50% af þeim launum fyrir nefndarstörf sín, eða 265.234 krónur á mánuði.

Við uppgjör fyrrnefndra verksamninga sem gerðir verða við vinnuveitendur nefndarmanna verður tekið tillit til þess að skilanefndarmönnum eru greidd laun vegna starfa sinna í þágu Fjármálaeftirlitsins.

Fjármálaeftirlitið hefur ekki upplýsingar um starfskjör bankastjóra nýju bankanna og vísar á stjórnir viðkomandi banka.

Eftirfarandi aðilar eru í skilanefnd Glitnis banka hf.:

Árni Tómasson, formaður, lögg.endurskoðandi,

Heimir Haraldsson, lögg.endurskoðandi,

Steinunn Guðbjartsdóttir, hrl.,

Sverrir Örn Þorvaldsson, framkvæmdastjóri áhættustýringar,

Ágúst Hrafnkelsson, innri endurskoðandi.

Efirfarandi aðilar hafa verið skipaðir í skilanefnd Kaupþing hf.:

Finnur Sveinbjörnsson, hagfræðingur, formaður skilanefndar,

Knútur Þórhallsson, löggiltur endurskoðandi.

Bjarki H. Diego, hrl.

Guðný Arna Sveinsdóttir, viðskiptafræðingur.

Steinar Þór Guðgeirsson, hrl.

Efirfarandi aðilar hafa verið skipaðir í skilanefnd Landsbanka Ísland hf.:

Lárus Finnbogason, lög. endurskoðandi, Formaður skilanefndar,

Ársæll Hafsteinsson, hdl.,

Einar Jónsson, hdl.,

Lárentsínus Kristjásson, hrl.,

Sigurjón Geirsson, lög. Endurskoðandi