Fjallað um fundarhöld og erfiðleika í helstu blöðum heims

Fjallað er um hin stífu fundarhöld í Ráðherrabústaðnum um helgina í öllum helstu blöðum Bretlands í morgun og sömuleiðis í hinu bandaríska Wall Street Journal.

Í því síðastnefnda segir að ríkisstjórnin hafi ásamt bönkunum reynt að útvega það lausafé sem þurfi til þess að bjarga bankakerfi landsins enda hafi efnahagskerfið á Íslandi fundið einna mest fyrir hinni alþjóðlegu efnahagskreppu. Bent er á gríðarlegan uppgang íslensku bankanna á síðustu árum sem gæti reynst þeim erfiður á næstunni og enn fremur er sagt að krónan hafi hrunið.

Þá segir breska blaðið Finacial Times að forsætisráðherra og Seðlabankinn hafi átt neyðarviðræður við stjórnir lífeyrissjóða og banka í von um að leysa lausafjárkreppu í landinu. Lífeyrissjóðirnir hafi verið beðnir um að selja hluta eigna sinna í útlöndum og þá leiti Seðlabankinn eftir láni til að auka gjaldeyrisforðann.

Þar er einnig sagt að ríkisstjórnin muni hugsanlega tilkynna um aukinn gjaldeyrisforða nú í morgunsárið en þó sé ekkert öruggt þar um. Þá segir Financial Times enn fremur að mikillvægasta en jafnframt umdeildasta ákvörðun stjórnvalda hafi verið að kaupa 75 prósenta hlut í Glitni. Seðlbankinn hafi sagt það eina kostinn í stöðunni en Jón Ásgeir Jóhannesson, hluthafi í Stoðum sem á stóran hlut í Glitni, og Richard Portes, prófessor við London School of Economics, hafi gagnrýnt aðgerðirnar.

Breska blaðið Times slær upp fyrirsögninni „Lamað Ísland sendir út fjármálalegt neyðarkall". Þar kemur enn fremur fram að íslensk stjórnvöld hafi leitað á náðir Bandaríkjamanna og hinna norrænu ríkjanna til þess að bjarga efnahag landsins.

Sagt er að íslensku bankarnir hafi verið undir þrýstingi stærstan hluta ársins og glími við gríðarlega verðbólgu hér á landi, minnkandi virði gjaldmiðilsins og afleiðingar ofhitnaðs hagkerfis. Seðlabankinn hafi reynt að berjast við verðbólguna með því að hækka stýrivexti í 15,5 prósent sem geri bönkunum enn erfiðara fyrir að fjármagna starfsemi sína.