Engin kreppa á Akureyri

Hjörleifur Hallgrímsson skrifar um fjármál Akureyrarbæjar

Satt að segja bjóst ég ekki við því að ég yrði útilokaður frá því að skrifa greinar í blaðið Vikudag hér á Akureyri og er ég spurði ritstjórann, Kristján Kristjánsson, hverju þetta sætti svaraði hann: Þú ert búinn með kvótann, Hjörleifur. Ég hafði skrifað nokkrar greinar í Vikudag á árinu og í sumum þeirra hafði ég verið gagnrýninn á störf meirihluta bæjarstjórnar en ekki svo að ég yrði sviptur ritfrelsi eins og í einræðisríki væri. Hafa ekki allir leyfi til að gagnrýna? Mér þótti þetta táknrænt vegna þess að undirritaður stofnsetti og rak Vikudag í u.þ.b. 10 ár og var ritstjóri blaðsins síðustu árin, en það skiptir svo sem engu máli héðan í frá, ég bara hugsa til þess að samkvæmt samningi þegar ég seldi Vikudag má ég byrja að gefa út sjálfur um nk. áramót.

Að þessu slepptu datt mér í hug að í öllu fjármálaruglinu, sem gengið hefur yfir þjóðina að undanförnu, yrði eitthvað slegið af hér á Akureyri en það ber lítið á því. Nýlega var kosin stjórn fyrir menningarhúsið Hof, en áætlaður byggingarkostnaður var 1,2 milljarðar, en fer líklega í 4 milljarða, og eftir frétt Vikudags að dæma fær formaðurinn 120 þúsund kr. á mánuði og aðrir í stjórn 60 þúsund kr. á mánuði. Allt er þetta fólk á launum annars staðar og formaðurinn trúlega á góðum launum. Þá var ráðinn framkvæmdastjóri fyrir batteríið en ekki hefur enn fengist uppgefið hve háum launum þar verður úthlutað, en fréttir herma að það verði vart undir 500 – 600 þúsundum á mánuði.

Og ég spyr, hvað er þarna í gangi? Ekkert hefur heyrst frá meirihluta bæjarstjórnar um að til standi að lækka laun hjá bæjarstarfsmönnum, að minnsta kosti þeim launahærri, en talið er að sumir deildarstjórar og sviðsstjórar séu með hátt í 1 milljón á mánuði og tekjuhæstu aðalmenn í bæjarstjórn voru með yfir 5 milljónir fyrir árið 2007 og eru í fullu starfi þar fyrir utan og sumir með mjög góð laun. Mér datt þetta í hug þegar fréttir berast af sveitarstjórnarmönnum utan af landi sem eru að gefa mismikið eftir af launum sínum til sinna sveitarfélaga. En það virðast vera nægir peningar til hjá Akureyrarbæ þar sem í ofanálag er lítið um að frestað sé framkvæmdum. Það eina verulega sem frést hefur af er stöðvun uppbyggingar

á KA-svæðinu, enda með fullu samþykki formanns félagsins.

Af öðrum framkvæmdum má nefna að uppbygging íþróttasvæðisins á Þórsvellinum er í fullum gangi fyrir um 1 milljarð kr. en átti að kosta innan við 500 milljónir, Naustaskóli er áætlaður um 2 milljarðar og íþróttahús við Giljaskóla fyrir um 1 milljarð kr. svo eitthvað sé nefnt. Meðan á öllu þessu gengur virðast engir peningar vera settir í gatnaframkvæmdir. Til marks um ófremdarástandið í þeim málum er að úttekt var gerð á 50 götum í Akureyrarbæ og fengu þær einkunn frá því að vera slæmar upp í ófærar. Ekki má gleyma því að á sama tíma ætlar meirihluti bæjarstjórnar (íhald og Samfylking) að vera með þrjá bæjarstjóra á kjörtímabilinu með auðvitað tilheyrandi stórauknum kostnaði. Það virðast vera til nægir peningar í ákveðin gæluverkefni og maður spyr sig er ekki eitthvað athugavert við forgangsröðunina?

En þess ber að geta að skipulagsmálin hjá Akureyrarbæ hafa aldrei verið sterkasta hliðin og bera dómsmálin,sem bærinn hefur tapað, því best vitni. Íhaldið og Samfylkingin eiga víðar umdeilanlega samleið en í landsstjórninni.

Höfundur er fyrrverandi ritstjóri.