Byr segir stöðuna sterka og að engin tengsl séu við Exista

Þetta segir í tilkynningu sem Byr sendi frá sér í dag. „Byr sparisjóður beinir þeim eindregnu tilmælum til þeirra sem eru að fjalla um stöðu sparisjóðanna á opinberum vettvangi, að gæta ummæla sinna. Nokkurs misskilnings hefur gætt á ólíkri stöðu sparisjóðanna og heitum þeirra jafnvel verið víxlað," segir ennfremur í tilkynningunni.

Ennfremur segir að vart þurfi að taka fram hversu alvarlegar afleiðingar slíkar rangfærslur geta haft fyrir jafnt Byr sem aðra sparisjóði, við þær aðstæður sem nú eru uppi. „Rétt er í þessu sambandi að taka fram að engin tengsl eru á milli Byrs og Exista.“

Þarna er verið að vísa til mistaka sem voru gerð í Morgunblaðinu í dag þar sem Byr er ruglað saman við SPRON og sparisjóðurinn sagður í hættu.

Að Byr standa fjórir sameinaðir sparisjóðir og hefur Byr talsverða sérstöðu að því leyti.