Funda með sendiherra Íslands vegna innistæða sveitarfélaga

Forsvarsmenn Samtaka sveitarfélaga í Englandi og Wales hyggjast á morgun funda með Sverri Hauki Gunnlaugssyni, sendiherra Íslands í landinu, vegna þeirra fjármuna sem sveitarfélög lögðu í íslensku bankana sem hrundu.

Eftir því sem breska blaðið Guardian greinir frá verður einnig fundað með forsvarsmönnum fjármálaráðuneytisins breska um stöðuna. Talið er að rúmlega hundrað sveitarfélög hafi lagt um 800 milljónir punda, vel á annað hundrað milljarða króna, inn í íslenska banka og vilja forsvarsmenn sveitarfélaganna að tekið verði tillit til krafna þeirra ekki síður en einstaklinga.

Segir Guardian að forsvarsmenn breska fjármálaráðuneytisins hafi lýst því yfir um helgina að nokkur árangur hefði náðst í viðræðum við Íslendinga um innistæður almennings í íslenskum bönkum en en meiri óvissa væri um innistæður bæði fyrirtækja og sveitarfélaga sem ekki njóti tryggingar stjórnvalda.

Verði Samtökum sveitarfélaga ekki ágengt á fundinum með Sverri á morgun segjast forsvarsmenn þeirra munu leita beint til íslenskra stjórnvalda.

Óljósar fregnir bárust af því að sveitarfélög gætu ekki greitt starfsmönnum sínum laun í mánuðinum vegna íslensku bankakreppunnar en þær voru bornar til baka í dag. Engu að síður er ætlunin að funda með fjármálaráðherra Bretlands um hugsanlegar aðgerðir til þess að aðstoða sveitarfélög ef þess þarf.