Eðlileg og skynsamleg viðbrögð við stöðunni

Gylfi Magnússon, dósent við viðskipta- og hagfræðideild Háskóa Íslands, segir aðgerðir ríkisstjórnarinnar á fasteigna- og fjármálamarkaði, sem kynntar voru í gær, eðlileg og skynsamleg viðbrögð við þeirri stöðu sem uppi er.

Ríkisstjórnin tilkynnti í gær að til stæði að hækka hámarkslán hjá Íbúðalánasjóði úr 18 milljónum króna í 20. Þá verður enn fremur hætt að miða við brunabótamat í lánveitingum sjóðsins og þess í stað miðað við 80 prósent af kaupverði eignar. Enn fremur verða stofnaðir tveir nýir lánaflokar hjá Íbúðalánasjóði sem bankar og fjármálafyrirtæki geta sótt í vegna íbúðalána sinna.

„Ég held að þetta séu allt saman eðlileg og skynsamleg viðbrögð við þeirri stöðu sem uppi er. Fasteignamarkaðurinn hefur eiginlega verið frosinn og allt sem kemur lífi í hann hlýtur að vera gott," segir Gylfi. Hann bendir á að stefnt hafi í vandræði hjá bæði fasteignaeigendum og verktökum og „þótt þetta endurreisi ekki markaðinn þá er þetta skref í rétta átt." Gylfi segir þó að aðgerðirnar breyti ekki því að fasteignaverð muni að líkindum lækka eitthvað.

Aðspurður hvort hann telji að aðgerðirnar muni hafa áhrif á verðbólgu í landinu segir Gylfi að þær gætu haft einhver áhrif en það sé ekki helsta áhyggjuefnið nú. Horfa þurfi til fleiri þátta.

Spurður um hvort ríkisstjórnin þurfi að grípa til frekari aðgerða bendir Gylfi á að nefndar hafi verið breytingar á stimpilgjöldum og beðið hafi verið eftir nánari fréttum af því. „Það myndi sjálfsagt vera örvunar ef þau yrðu lögð niður en það þýðir að sjálfsögðu að ríkið verður af tekjum," segir Gylfi.