Vegagerðin er ekki eins og ríki í ríkinu

Ákvarðanir um vegalagningu, til dæmis varðandi Dettifossveg, Lyngdalsheiðarveg og Vestfjarðaveg um Teigsskóg, eru ekki teknar að óathuguðu máli. Þetta kemur fram í fréttatilkynningu sem Vegagerðin hefur sent frá sér vegna ummæla Bergs Sigurðssonar, framkvæmdastjóra Landverndar. Bergur segir að málum þar sem framferði Vegagerðarinnar sé í hæsta máta ámælisvert fari fjölgandi. Vegagerðin sé farin að haga sér eins og ríki í ríkinu

Vegagerðin segist leggja fram möguleikana og mæli gjarnan með einum umfram annan. Mat á umhverfisáhrifum fari fram þar sem farið er yfir þá þætti sem snúi að umhverfinu og náttúrunni. Skipulagsyfirvöld, eða sveitastjórnir, taki síðan ákvörðun um skipulag og þar með talda veglínuna og gefi út framkvæmdaleyfi. Allt þetta ferli taki gjarnan nokkur ár og síðan bætast við samningar við landeigendur.

„Vegagerðin tekur þannig ekki ákvörðunina um hvaða leið verður endanlega fyrir valinu þótt Vegagerðin færi rök fyrir því afhverju hún telji einn kost öðrum betri. Má til dæmis varðandi Dettifossveg nefna að árið 2001 var stofnaður samráðshópur sem í áttu sæti fulltrúar sveitarfélaga, Náttúruverndar ríkisins, Ferðamálaráðs og Samtaka ferðaþjónustunnar auk Vegagerðarinnar sem komst að þeirri sameiginlegu niðurstöðu síðla árs 2002 að legga veginn vestan Jökulsár," segir í tilkynningu frá Vegagerðinni.