Með leikheimild hjá KSÍ þrátt fyrir að hafa viðbeinsbrotið dómara

"Mér finnst þetta algjörlega fyrir neðan allar hellur," segir Valur Steingrímsson knattspyrnudómari sem viðbeinsbrotnaði eftir árás Davíðs Smára Helenarsonar í knattspyrnuleik í utandeildinni síðasta sumar.

Þrátt fyrir að hafa verið úrskurðaður í eins árs bann af utandeildinni fyrir árásina er Davíð nú aftur kominn á fullt í fótboltanum. Nú með knattspyrnuliði Álftnesinga í 3. deild Íslandsmótsins í knattspyrnu.

Ástæðan fyrir því að það er mögulegt er sú að utandeildin tilheyrir ekki Knattspyrnusambandi Íslands. Það kom því aldrei inn á borð sambandsins að Davíð hefði undir lok leiks FC Dynamo og Vatnaliljanna ráðist á dómara leiksins og viðbeinsbrotið hann. Sambandið afgreiddi því félagsskipti hans í lið Álftnesinga í vor og hefur Davíð staðið á milli stanganna hjá liðinu í undanförnum leikjum.

Valur Steingrímsson, sem varð fyrir árás Davíðs síðasta sumar, skilur ekkert í Álftnesingum að vilja hafa slíkan ofbeldismann í liði sínu. Hann segist hafa heyrt af því að dómarar muni neita að dæma leiki sem Davíð kemur nálægt en segist ekki vita hvort þeir hafi látið verða af því.

Valur var frá vinnu í töluverðan tíma eftir árás Davíðs og kærði málið til lögreglu. Síðan þá hefur Davíð gerst sekur um fleiri líkanmsárásir sem bíða meðferðar dómstóla. Einn þeirra var á landsliðsmann í knattspyrnu, Hannes Þ. Sigurðsson, en hann var frá æfingum í nokkurn tíma eftir að hafa kinnbeinsbrotnað í viðskiptum sínum við Davið Smára.

Þórir Hákonarson framkvæmdastjóri KSÍ þekkti til máls Davíðs frá því í fyrra en segist ekki hafa vitað að hann væri kominn með leikheimild hjá Álftnesingum. Þórir segist ekki geta aðhafst neitt í máli Davíðs þar sem hann hafi ekki brotið af sér í leik á vegum sambandsins.