Forysta, frumkvæði, fórnfýsi

Á síðasta ári bárust björgunarsveitum Slysavarnafélagsins Landsbjargar 1500-2000 beiðnir um aðstoð. Það eru að meðaltali 3-4 útköll á degi hverjum, allan ársins hring. Þessum útköllum sinna sjálfboðaliðar sem taka tíma frá fjölskyldu og atvinnu til að aðstoða samborgara í neyð.

En útköllin eru aðeins toppurinn á ísjakanum, þau eru sá hluti starfsins sem er mest sjáanlegur. Lauslegir útreikningar sýna að á bak við hverja stund í útkalli standa 12 klukkustundir í æfingum, þjálfun, viðhaldi tækja og fjáröflun. Kostnaður við rekstur björgunarsveitar er mikill enda þarf tækjakostur að vera góður og í lagi þegar kallið kemur.

Kerfið sem Íslendingar hafa komið upp til að takast á við hættur sem að steðja er einstakt í heiminum, hvergi annars staðar gegna sjálfboðaliðar eins stóru hlutverki í leit og björgun og í almannavarnakerfi eins og hér á landi. Því þurfa sjálfboðaliðarnir að gangast undir mikla þjálfun og stífar æfingar til að geta sinnt störfum sínum. Í stærri sveitum er algengt að nýliðar undirgangist tveggja ára starfsþjálfun áður en þeir fara í sitt fyrsta útkall. Björgunarsveitafólk stendur einnig straum af kostnaði við persónulegan búnað en hann getur hlaupið á hundruðum þúsunda króna.

Á bak við hvern meðlim björgunarsveitar stendur svo hópur fólks sem styður hann og án þeirra væri starfið ekki mögulegt. Þar er fjölskyldan sem situr heima þegar sveitin er kölluð út, oft í hættuleg verkefni við erfiðar aðstæður, vinnuveitandinn sem gefur leyfi án þess að skerða launin, og ekki síst almenningur sem styrkir starfið með kaupum á flugeldum og Neyðarkalli. Björgunarsveitirnar eru því sameiginlegt verkefni samfélagsins alls.

Þrátt fyrir þetta hefur nýliðun í sveitum sjaldan gengið eins vel og undanfarin ár og áhugi landsmanna á að taka þátt í sjálfboðna starfinu er mikill. Ávinningurinn er nokkur; góður félagsskapur, ferðalög og tækifæri til að láta gott af sér leiða.

Um helgina fer fram fjáröflunin „Neyðarkall björgunarsveita" sem er ákall til þjóðarinnar að styðja við bakið á því starfi sem björgunarsveitir sinna í samfélaginu.

Nú er tími til að standa með björgunarsveitunum því alla aðra daga ársins standa þær með þér!