Eldur úr logandi bíl kveikti nær í íbúðarhúsi

Minnstu munaði að eldur úr logandi bíl næði að kveikja í íbúðarhúsi við Hófgerði í Kópavogi um klukkan hálf þrjú í nótt.

Útveggur var farinn að sviðna þegar slökkviliðið kom á vettvang og slökkti eldinn. Bíllinn er gjör ónýtur og eldsupptök eru ókunn.

Þá var eldur tvisvar kveiktur í nýlegum Landcrusier jeppa við Mánagötu í Keflavík í gærkvöldi og í nótt. Slökkviliðið var hvatt til í bæði skiptin, en jeppinn er nú talinn ónýtur.

Lögregla telur fullvíst að kveikt hafi verið í bílnum í bæði skiptin og biður þá, sem kunna að hafa einhverjar vísbendingar, að hafa samband við sig.