Pressa á Agbonlahor

Martin O'Neill, knattspyrnustjóri Aston Villa, segist ekki hafa neinar áhyggjur af markaþurrð Gabriel Agbonlahor. Þessi sóknarmaður liðsins hefur ekki skorað síðan í sigurleik gegn Wigan 29. desember í fyrra.

Agbonlahor hefur nú leikið tíu leiki í röð án þess að skora en O'Neill segist viss um að leikmaðurinn fari að finna netmöskvana.

„Gabby er síðasti leikmaðurinn í heiminum sem ég færi að gagnrýna. Fyrir stuttu átti hann afbragðs leik gegn Arsenal. Það er samt alltaf pressa á sóknarmenn að skora og honum hefur gengið illa að skila mörkum að undanförnu," segir O'Neill.

„Ég hef þó engar áhyggjur því hann er að skila mörgu öðru í okkar leik en að skora mörk. Hann mun byrja að skora aftur bráðlega. Þetta er eitt af því sem ég hef hvað minnstar áhyggjur af í augnablikinu."