Greining Landsbankans spáir yfir 4% hagvexti árið 2011

Greining Landsbankans spáir því að hagvöxtur á Íslandi verði yfir 4% árin 2011 og 2012. Í ár verði hagvöxturinn hinsvegar rúmt prósent, enginn hagvöxtur verði á næsta ári og hann verði um 1% árið 2010.

Þetta kom fram á morgunverðarfundi greiningar Landsbankans á Hótel Nordica sem nú stendur yfir. Þar kynnir greining hagspá sína fram til ársins 2012 undir fyrirsögninni "Öfundsverðar langtímahorfur".

Halldór J. Kristjánsson bankastjóri Landsbankans gerði þessa hagvaxtarspá m.a. að umtalsefni í setningarávarpi sínu. Hann segir að mikilvægt sé að kynna þessar hagvaxtarhorfur fyrir erlendum aðilum og að slíkt muni hafa meiri áhrif en nokkurt annað.

Edda Rós Karlsdóttir forstöðumaður greiningarinnar hafði framsögu um hagspánna. Í spánni kemur m.a. fram að mikið muni draga úr einkaneyslu á tímablinu eða um 12%. Þar munar mest um samdrátt í lánsfjármagnaðri neyslu.

Þá spáir greiningin því að umfang stóriðjuframkvæmda verði hið sama og það var á árunum 2004 til 2007 eða upp á um 440 milljarða kr. á næstu fimm árum.

Muni vöxtur stótiðjuframkvæmda og framkvæmda á vegum hins opinbera vega upp á móti miklum samdrætti í íbúðabyggingum og fjarfestingum atvinnuveganna.

Þá reiknar greiningin með að verðbólga verði að jafnaði 5% á næsta ári og að krónan muni áfram verða veik. Spáir greiningin því að gengisvístalan verði að jafnaði um 155 stig.