Hringurinn farinn að þrengjast um hundaníðinginn

Lögreglan á Suðurnesjum hefur ekki haft uppi á eiganda hvolpsins sem fannst grafinn lifandi í gærmorgun. Fjölmargir hafa hringt og nokkrar vísbendingar hafa borist vegna málsins. Fólki blöskrar meferðin á hvolpinum sem dýralæknir telur að muni ná sér.

„Hann er farinn að þrengjast um hann hringurinn," sagði lögreglan á Suðurnesjum þegar Vísir hafði samband vegna málsins í morgun.

Forsaga málsins er sú að lögreglunni barst tilkynning um að hundur hefði fundist í hrauninu skammt frá Kúagerði, þar sem ekið er í áttina á Keili. Þar hafði fólk sem var að viðra hunda sína gengið fram á lítinn hvolp sem hafði verið grafinn lifandi og skilinn eftir.

Hvolpurinn sem talinn er vera Doberman blanda er líklega um fjögurra mánaða gamall og var mjög máttfarinn, mikið bólginn og gat ekki staðið sjálfur uppi.

Þar sem hvolpurinn var ómerktur og er án örmerkis, er ekki vitað um eiganda. Lögreglan biður því þá sem hafa einhverja vitneskju um málið að hafa samband við sig í síma 420-1800.