Þeir tíu tryggustu

Það er mjög sjaldgæft í dag að sterkir leikmenn leiki með sama liðinu allan sinn feril. Það eru þó nokkrar breskar fótboltastjörnur sem hafa haldið mikilli tryggð við sitt lið.

Blaðamenn The Sun tóku saman lista yfir þá tíu tryggustu og röðuðu þeim í sæti. Tekið var tillit til afreka og tryggðar við gerð listans.

1. Ryan Giggs - Manchester United

Töframaðurinn frá Wales trjónir á toppi listans. Það munaði litlu að hann færi til Manchester City sem krakki en United krækti í hann og alla tíð síðan hefur hann sýnt mögnuð tilþrif. Hefur í búningi United unnið níu enska meistaratitla og Meistaradeildina. Paul Scholes og Gary Neville hafa einnig leikið alla tíð á Old Trafford en Giggs ber þó höfuð og herðar yfir þá.

2. Billy Wright - Wolves

Wright er kallaður herra Úlfur. Hans ást fyrir félaginu þegar hann fór að vinna við heimavöll Wolves aðeins tíu ára gamall. Hann lék fjölmarga leiki fyrir félagið og bar fyrirliðaband enska landsliðsins. Settist í stjórn félagsins eftir að hafa hætt knattspyrnuiðkun.

3. Tony Adams - Arsenal

Adams var kletturinn í vörn Arsenal í átján ár. Mancheste United reyndi að fá hann á sínum tíma en hann neitaði við mikla gleði stuðningsmanna Arsenal. Er nú aðstoðarstjóri Portsmouth en dreymir líklega um að stýra Arsenal dag einn.

4. Jack Charlton - Leeds

Var í skugga Bobby bróður síns. Er goðsögn í augum stuðningsmanna Leeds United eftir að hafa verið allan sinn feril á Elland Road. Lék yfir 700 leiki í búningi félagsins.

5. Tom Finney - Preston

Pípulagningarmaðurinn sem sýndi Preston mikla tryggð. Þrátt fyrir áhuga að utan vildi Finney aldrei yfirgefa Preston og stóð við það.

6. Nat Lofthouse - Bolton

Stúka á Reebok stadium heitir eftir þessum leikmanni. Var drjúgur í markaskorun fyrir Bolton og enska landsliðið.

7. Matt Le Tissier - Southampton

Skoraði mörg mögnuð mörk á sextán ára ferli. Stærri lið Englands reyndu að fá hann til sín en án árangurs.

8. Steven Gerrard - Liverpool

Ást hans á Liverpool er ótvíræð. Var næstum því farinn til Chelsea á sínum tíma en gat ekki slitið sig frá Liverpool. Á þann draum að vinna ensku úrvalsdeildina með félaginu.

9. Trevor Brooking - West Ham

Þessi snjalli leikmaður lék með West Ham 1967 - 1984 og er frægastur fyrir sigurmark West Ham í bikarúrslitaleik gegn Arsenal þegar liðið var í deild fyrir neðan Arsenal.

10. John Terry - Chelsea

Það er erfitt að ímynda sér Terry spila fyrir annað félag en Chelsea. Hefur tvívegis unnið ensku úrvalsdeildina og var gerður að fyrirliða enska landsliðsins.