Kviðdómurinn í Færeyjum situr enn á rökstólum

Kviðdómurinn í máli Birgis Páls Marteinssonar situr enn á rökstólum við að ákveða sekt hans eða sýknu. Kviðdómurinn lokaði sig inn klukkan tólf á hádegi. Hann hefur því setið í tæpa fimm tíma.

Færeyskur blaðamaður sem Vísir talaði við fyrir stundu sagði að þessi langa seta benti til þess að kviðdómurinn væri ekki sammála um niðurstöðuna. Tólf manns eru í kviðdóminum og átta af þeim tólf verða að ná samkomulagi til þess að niðurstaðan sé gild.

Saksóknarinn krefst þess að Birgir Páll verði dæmdur til þyngstu mögulegu refsingar. Hún er allt að fjórtán ára fangelsi.