Rík ástæða til að fara fram á nálgunarbann

Stefán Eiríkisson, lögreglustjóri á höfuðborgarsvæðinu, segir að embættið hafi talið ríka ástæðu til að fara fram á áframhaldandi nálgunarbann manns sem ákærður hefur verið fyrir að beita sambýliskonu sína grófu líkamlegu og kynferðislegu ofbeldi.

,,Við setjum þetta fram af því að teljum ríka ástæðu til þess en það er síðan dómstólanna að meta það og þeir komast að þeirri niðurstöðu að svo sé ekki. Við þá niðurstöðu verðum við að sættast eins og allir aðrir. Ég ber mikla virðingu fyrir dómstólum þessa lands," segir Stefán.

Rannsóknin teygir anga sína út fyrir landsteinana og hefur lögreglan þurft að leita aðstoðar lögregluyfirvalda í Danmörku, Noregi og Svíþjóð. Hæstiréttur úrskurðaði í gær að hinn ákærði skuli ekki sæta áframhaldandi nálgunarbanni næstu þrjá mánuði en hann var dæmdur í janúar í sex mánaða nálgunarbann.

Ákærði beitti sambýliskonu sína ofbeldi og sýna myndir og myndbönd merki um miklar barsmíðar. Maðurinn fékk ókunnuga karlmenn til að eiga samræði við sambýliskonu sína gegn hennar vilja. Ákærði myndaði kynferðislegar athafnir mannanna með konunni. Ofbeldið átti sér stað á árunum 2005 til 2007.