Nálgunarbanni ekki beitt nema með skýrum lagaákvæðum

Jón Steinar Gunnlaugsson, hæstaréttardómari, segir að nálgunarbanni sé ekki beitt nema með skýrum lagaákvæðum. ,,Forsendurnar eru í dómnum og byggist á því að menn verði ekki beittir þvingunum nema samkvæmt skýrum lagaákvæðum," segir Jón Steinar sem vildi að öðru leyti ekki tjá sig um dóm Hæstaréttar frá því í gær.

Hæstiréttur hafnaði beiðni lögreglunnar á höfuðborgarsvæðinu að sex mánaða nálgunarbanni manns, sem ákærður hefur verið fyrir að beita sambýliskonu sína grófu líkamlegu og kynferðislegu ofbeldi, yrði framlengt um þrjá mánuði.

Meirihluti dómenda Hæstaréttar í málinu, þeir Jón Steinar og Ólafur Börkur Þorvaldsson, telur að ekki liggi fyrir rökstuddur grunur um að maðurinn muni brjóta gegn fyrrverandi sambýliskonu sinni eða raski friðar hennar á annan hátt. Páll Hreinsson skilaði sératkvæði.

Jón Steinar vildi ekkert láta hafa eftir sér varðandi orð Atla Gíslasonar, alþingismanns og hæstaréttarlögmanns, sem telur að hann hafi sérstakar skoðanir í kynferðisafbrotamálum. Atli sagði í samtali við Vísi fyrr í dag að Jón Steinar hefði gott af við því að vinna sjálfboðaliðavinnu á neyðarmóttöku Borgarspítalans, Kvennaathvarfinu og Stígamótum.

- Segir Jón Steinar hafa sérstakar skoðanir í kynferðisafbrotamálum

- Rík ástæða til að fara fram á nálgunarbann

- Rannsókn á grófum ofbeldisbrotum nær út fyrir landsteinana