Bönd á stjórnlausan glannaskap við skuldsettar yfirtökur

Aðalsteinn Hákonarson deilarstjóri eftirlitsdeilar ríkisskattstjóra segir að koma þurfi böndum á þann stjórnlausa glannaskap sem ríkt hefur við skuldsettar yfirtökur á fjármálamarkaðinum hérlendis.

Aðalsteinn skrifar grein um málið í Tíund, fréttabréf ríkisskattstjóra, undir fyrirsögninni "Skuldsettar yfirtökur og öfugur samruni". Hann vill bæta lög um hlutafélög, tryggja að reikningsskil fyrirtækjanna hafi eðlilegt jarðsamband og búa þannig um hnútana að endurskoðendur þori að stíga til jarðar í návist viðskiptavina sinna án þess að óttast um að það fækki í kúnnahópnum við það.

Með skuldsettum yfirtökum er átt við er eitt félag kaupir annað, borgar hluta af kaupverðinu með reiðufé en fær hitt að láni. Eftir kaupin er lánið svo sett yfir á félagið sem keypt var. Til að fegra myndina og draga úr þeirri staðreynd að félagið sem keypt var er orðið yfirskuldsett er viðskiptavild þess svo keyrð upp, oft úr öllu hófi, í bókhaldi félagsins.

Aðalsteinn birtir töflu með grein sinni yfir þróun heildareigna, viðskiptavildar og eiginfjár 20 félaga í kauphöllinni. Þar kemur fram að viðskiptavildin eins og sér hefur fimmtánfaldast á tímabilinu frá 2003 til 2007.

Árið 2003 skráðu þessi 20 félög viðskiptavild sína upp á samtals rúmlega 62 milljarða kr.. Í fyrra var þessi tala komin í rúmlega 931 milljarð kr..

"Í raun má halda því fram að viðskiptalífið hafi þrifist á vissum blekkingum sem snérust um að sýna eins góða fjárhagsstöðu fyrirtækjanna og mögulegt var með því að færa allar eignir þeirra á hæsta mögulega verði og stuðla þannig að því að gengi hlutabréfanna yrði sem allra hæst," segir Aðalsteinn.