Ástarvikan í fimmta sinn í Bolungarvík

Ástarvikan var sett í Bolunungarvík í fimmta sinn í gær. Tilgangur hennar er að fjölga bæjarbúum og standa vonir til þess að nokkur ástarvikubörn líti dagsins ljós að níu mánuðum liðnum.

Ástin lá svo sannarlega í loftinu í Bolungarvík við setningarathöfnina í gær. Ástarvikan hófst á því að eitt hundrað ástarblöðrum var sleppt út í loftið og fylgir þeim ástarkveðja frá Bolvíkingum til heimsbyggðarinnar. Þá var plantað hundrað hjarta ástarskógi og svokallaðir veraldarvinir frá sjö þjóðlöndum sungu og spiluðu alþjóðlega ástarsöngva og dönsuðu eggjandi magadans.

Eitt ástarvikubarn kom í heiminn á þessu ári en flest hafa þau verið þrjú. Mikill þrýstingur hefur verið á bæjarbúa að fjölga sér í ár og standa vonir til að ástarvikubörnin verði allt að fimm á næsta ári. Bæjarbúar taka vel í þetta uppátæki.

Fjölmargir viðburðir verða haldnir tengdir ástarvikunni út þessa vikuna, allt frá gönguferðum upp í tónleika. Ekki er þó verið að predika stóðlífi því bæjarbúum stendur til boða kennslufyrirlestur um hvernig halda á eilífa tryggð við makann.