Mikilvægt að Ólafur F sé við fulla heilsu

Ólafur Þ Harðarson prófessor í stjórnmálafræði sagði við Fréttastofu Sjónvarpsins nú í kvöld að borgarbúar ættu ekki neina heimtingu á því að boðað verði til kosninga.

Ólafur sagði að sveitastjórnir þyrftu að sitja öll sín fjögur ár og það væri borgarfulltrúanna að mynda meirihluta.

Hann sagði jafnframt að svo virtist sem meirihlutasamtarfið stæði tæpt nú þar sem Margrét Sverrisdóttir varaborgarfulltrúi Frjálslyndra styddi ekki samstarfið. Hann sagði þessa stöðu þó eitt sinn hafa komið upp í Vestmannaeyjum um tíma og bætti því við að mikilvægt væri að aðalfulltrúi Frjálslyndaflokksins, Ólafur F Magnússon, væri við fulla heilsu með hliðsjón af því.